நட்சத்திரவாசி

படங்களுக்கு வண்ணம் எழுதுபவனே
உன் தூரிகைப்பட்டு வந்துதித்த
சூரியன் வெறுமையாய்
நிற்பதை அறிவாயோ
எக்கணத்தில் நானதை வீட்டுக்கு
கொண்டுவந்தேனோ
கூடடைய விடாமல் நிற்கும்
சூரியனுக்கு பறவைகள் குறித்து
இவ்வளவு அலட்சியம் ஏன்
அவை அப்படியே இருக்கவும்
அசையாமல் இருக்கவும்
வஸ்துக்கள் என்று நினைத்தாயோ
களைத்து போன அந்த
தோணிக்காரனை பார்
சதாகாலமும் துடுப்பையே
பிடித்து கொண்டிருந்தால்
வீடடைய அவனுக்கும் தோன்றாதோ
மேலும்
வீட்டு முற்றத்தில் தானியங்களை
பொறுக்கி தின்னும் கோழியும் குஞ்களையும்
கண்டாயா
அவற்றுக்கும் இல்லையோ பொழுது சாய்தல்
பற்றிய கவலையும்,ஏக்கமும்
பொழுது சாய்ந்தாலும் பொழுது சாயாமல்
அப்படியே வைத்திருக்க
உன் தூரிகையை தூண்டியது எது?

mujeebu2000@yahoo.co.in